گؤزلريميز آيدين

گؤزلريميز آيدين



ائلشن اوريادلي



ايلک اؤنجه ، ميللي سردار و اولو اؤندريميز شهيد ستارخانين شهادتي نين 92-جي ايل دؤنومو آبان آيي نين ايگيرمي بئشينده بوتون باسقيلار و تضيييقلره رغما کئچن ايللردن داها گوجلو و داها مؤحتشم کئچيريلمه سينه گؤره دوغروداندا گؤزلريميز آيدين . داها سونرا گؤزلريميز آيدين اونا گؤره کي ، فارس شووونيسمي گونو – گوندن داها آرتيقراق مغلوبيته اوغراييب سارسيلاراق گولمه جه لي ايشلره ال وورماسييلا اؤز حاقسيزليغيني و آذربايجان خالقي نين بوتون ايستکلريني دانيلماز وكئچيلمزحاق اولدوغونو گؤسترير . ميللي سرداريميزين بو ايل کي آنما تؤره ني ائله بو يؤندن ايسه چوخلو ديقته لاييق ايدي . آذربايجان خالقي نين غدار دوشمني اولان ، فارس شووونيسمي نين ستارخانا قورولان تؤرنه آخماقجاسينا قاتيليب تؤره ن قورماسي ، ايران آدلانان اؤلکه نين کئچميش ايچ ايشلر باخاني ( موسوي لاري ) نين دئديگي سؤزو دوغروداندا جانلانديريردي کي ، 1382 -جي ايلده داخيلي ايشلر باخانليغيندا کئچيريلن واليلر توپلانتي سيندا ( اوستاندارلار و فرماندارلار ييغينجاغيندا ) دئميشدير : بوگون آذربايجان قونوسونا ال ووروب وورماماق ، بيزه بير پارادوکسا چئوريله ره ک ، ال ووروساندا خارابلاشير ال وورماساندا .
بو ايفاده ائله بير واختدا دئييلميش کي ، هله آذربايجان ميللي اويانيش حرکاتي بو گون الده ائتديکلري نين بير چوخونو الده ائتمه ميشدي . ايندي کي ، آذربايجانين ميللي اويانيش حرکاتي بير چوخ سينيرلاري سينديريب اؤز ايره ليله مه سيني کوتله لر سيراسينا ائنديره ره ک نئچه ميليونلوق بير آکسييالاري قورماق گوجونه ماليک اولموش ، فارس شووونيسميني ال-آياغيني ايتيريب گيجلدنمه سينه گتيريب چيخارميشدير . بو ايل آذربايجانيميزين خلف اوغوللاري و قيزلاري لاييقينجه فارس شوونيسمي نين بوتون تدبيرلريني و اويدورمالاريني سينديريب ، اؤز ميللي سردارينا سايغي گؤسترمه و آنيت تؤره ني توتارکن ، ايران آدلانان اؤلکه نين امنيتي و ايطيلاعات گوجلري نين ده اوبيري طرفده مثلا تؤرن قورمالاري ، فارس شووونيسمي نين اؤزونو ايتيرمه سي نين اؤلوم آشيريسينا چاتماسيني ثوبوت ائدير . حؤکومت طرفيدن قورولان بو تؤرنده بيرچوخ آخساقليقلارين اولدوغونا گؤره اونو بير آنيت تؤره ني يوخ ، بلکه ده ، ايراق ستارخانيميزدان بير تؤوهين و سينديرما کيمي ديرلنديرمک اولار ، چونکي ستار خانين حصارلانميش مزاري نين اوزه رينده ( باشقا لارينا حصار آراسينا گيرمك ايمكاني يوخ ايدي ) بو تؤره نين ايشتيراکچيسي ، آنجاق بوتون تؤره ن بويو نامازا قورشانان بيرنئچه ايطيلاعات آدامي ، بير قاراچي قادين و اونونلا ياناشي اوتوران 3-4 ياشيند بورنو باتيق بير قيز اوشاغي ، بير مداح کي شوبهه سيز اودا ايطيلاعات گوجلرينه باغلي ايدي و بيرنئچه کامئرامندن آرتيق دئييل ايدي . اونلارين قوردوقلار تؤرن ، مثلا آنيت تؤره ني اولسايدي موطلقا گوجلو اولماسي گؤزله نيليردي . دئمك حؤكومت اؤز تيليويزيا سيندان رسمي اولاراق بيلديريش يايب قورماق ايسته ديي يي تؤره نين بؤيله جه كئچيريلمه سي اؤزو هربير شئيي آچيق و آشكارجاسينا آيدينلاشديريردي . (حؤكومتين بو آلچاغليغي و آجيناجاغلي ايشي هله ده حؤكومته ياناشان بعضي آذربايجانليلارين ديقتينه ! ) فارس شوونيسمي نين ستارخانا قارشي بو چيركين موناسيبتي ، اؤز آلچاغليغي نين نده نيند ه ن آسيلي اولاراق ، هنده ورينه ييغيشان يوخودا اولان آذربايجانليلارين حقيقتي اؤز گؤزلري ايله گؤره ره ك اوركوب قاچمالارينا سبب اولا بيلر .
حؤکومتين گولمه جه لي يا خود چاره سيزلي يي نده ني ايله ائتدي يي تدبيرلرده ن بيريده ، يوزلرله الي سيلاحلي عسگرلرله ياناشي بيرچوخ انصاري حيزب-اوللاه کيمي شخصي گئييمليلرين آخين ائتمه سي ايدي ، کي ، حؤکومت ، اؤلمك وار دؤنمك يوخ ! دئيه ن آذربايجان ميللي اويانيش حركاتي نين فعالارينا قارشي خورداد آييندان درس آلماياراق دميرتوخماق هده-قورخوسو ايله بلكه ده سينانميش يوللاري بير داها سيناماق ايسته ييردي . موسوي لاري نين واختي ايله آذربايجان سورونونو بير پارادوكس كيمي ديرلنديرمه سي ، و حؤكومتين آذربايجانليلارا قارشي زامان – زامان منفي داورانيشلاري ، فارس شوونيسمي نين سورونون نه اولدوغونو بيلمه سينه رغما آذربايجان خالقينا هئچ بير اينساني حاقلاري سيرتيقجاسينا رسميته تانيماييب وئرمه مه سيني گؤسترير . فارس شوونيسمي نين آذربايجان سورونونا قارشي منفي موناسيبتلري كئچميش رئژيم ده ن ميراث قالميش آپارتايد وسيلمه سياستي نين داوامي دئمكدير ؛ بو آرادا آذربايجان خالقي اؤز آماجلاريني الده ائتمك اوچون يورولمادان آرديجيل اولاراق مبارزه سينه داوام ائتمه سي ، فارس شووونيسميني بؤيله جه سارسيلتميشدير . فارس شوونيسمي نين اؤزونو و ال – آياغيني ايتيرمه سي آذربايجان ميللي اويانيش حرکاتي نين غلبه چالماسي نين ياخينلاشماسيني و خورداد آييندا عزيز جانلاريني وطن اوغروندا قوربان وئره ن اولو شهيدلريميزين اونورلو قانلاري نين يئرده قالماماسيني گؤسترير.
گله جك بيزيمدير دئيه‌ ؛ گله جه يه دوغرو ، ياهو !
ياشاسين آذربايجان
اؤلوم اولسون شوونيسمه





elshanoryadli@gmail.com